Link açıqlığı

«Sebat» teşkilâtı: Qırımnıñ «narazılıq meydanları» meselesini ukrain qanunlarına köre çezmek mümkün


İşğal etilgen Qırımda «narazılıq meydanlarınıñ» iştirakçileri nevbetteki matbuat-konferentsiyasını keçirdiler. Qırım.Aqiqat mühbiri bergen malümatqa köre, iştirakçilerden bazıları «Sebat» cemaat teşkilâtınıñ vekilleri ile Qırım «Devlet şurası» deputatlarına muracaatnı yazğanlar, mında olar topraq meselesi boyunca öz noqtaiy nazarını bildirdiler.

«Biz, «narazılıq meydanlarınıñ» iştirakçileri olıp, meseleni çezmek içün soñki vaqıtları qabul etilgen qanun leyhalarında ihtiyac yoq olğanını tüşünemiz. «Narazılıq meydanlarınıñ» iştirakçilerine topraq berüv meselesinde muayyen bir neticelerge irişken evelki ükümetniñ işine tayanıp, keçici müddet devamında meseleni Ukraina Qanunlarına köre al etmege yeterli olur edi. İşbu qanunlarda er bir vatandaşnıñ topraq damartasınıñ saibi olmaq aqqı yazılğan, böyleliknen Qırımda işbu problemanı yoq etmek mümkün olur edi», – dedi «Sebat» cemaat teşkilâtnıñ reisi Reşat Seydaliyev.

Faallerniñ fikrine köre, bu kibi topraq ziddiyetlerine alâqası olğan akimiyet vekillerini ve mütehassıslarnı celp etip, komissiyanı teşkil etmek kerektir.

«Mezkür meseleni çezmek ve topraq damartasını elde etmek aqqını on yıllarnen talap etken adiy insanlarnıñ istegini yerine ketirmek içün kerek», – dedi «Sebat» teşkilâtınıñ azası Fazıl İbragimov.

Avgust ayından qırım akimiyeti topraq saası ve meseleleri boyunca uquq çıqarıcı teşebbüsini alıp barmaqta, amma memurlar, qanun leyhalarını qabul etip, akimiyet organlarına cemaatçılıqtan yollanılğan deñiştirüvlerni körmemezlikke urdılar.

«Bu meselede yardımnı federal akimiyet, prezidentten soramalımız. Prezident qarışmağance, Qırım akimiyeti bu meselede bir şey yapmaz», – dedi «Sebat» cemaat teşkilâtınıñ azası Seydamet Gemeci.

Qırım.Aqiqat mühbiri aytqanı kibi, matbuat konferentsiyasında Qırımnıñ «uquq qoruyıcı organlarınıñ» hadimleri bulunıp, ketişatnı kamerağa çektiler.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG