Ekspert, faal, siyasetçi ve jurnalistler Herson vilâyetiniñ bazı rayonlarında qırımtatarlarnıñ milliy territorial cumhuriyetni qurmaq erte olğanını tüşüneler.
Bunı «Qırımtatar halqınıñ aq-uquqlarını temin etüvde ukrain yolu» konferentsiyasında Pilip Orlik adına demokratiya İnstitutınıñ eksperti Natalya Belitser taqdim etken tedqiq neticeleri tasdıqlay, dep haber ete Qırım.Aqiqat mühbiri.
Onıñ aytqanına köre, tedqiq devamında Ukrainanıñ farqlı vilâyetlerinde cemaat, jurnalist ve ekspertler soraştırıldı.
«Rey bergenler deyler ki, Herson vilâyetinde qırımtatarlarnıñ milliy territorial cumhuriyetiniñ meydanğa ketirilmesi ya belli degil, ya da ğayet davalı mesele ve yerli ealiniñ zıddiyetini qarşılıq olaraq ala bile», – dedi Belitser.
Tedqiqçiniñ bildirgenine köre, Ukraina cemiyeti qırımtatar cumhuriyetiniñ kerekligini añlasın dep, bir sıra malümat maarif kampaniyalarnı keçirmeli ve tamır halqlar uquğını qoruv saasında halqara uquq aletlerini añlatmalı.
Konferentsiyada bulunğan qırımtatarlarnıñ lideri Mustafa Cemilev dedi ki, milliy territorial cumhuriyet qurulması – Ukraina akimiyetine amelge keçirmege qıyın olacaq bir vazifedir.
«Ğaye şundan ibaret ki, Qırımğa yaqın Hurson vilâyetiniñ bazı rayonlarını Qırım Muhtar Cumhuriyetine qoşmaq kerek. Bu ğayet qıyın vazife, çünki Anayasa deñişmeleri kirsetilmek kerek», – dedi Cemilev.
Onıñ aytqanına köre, al-azırda QMC sıñırlarını kenişletüv munaqaşaları devam etmekte, Ukraina prezidenti Petro Poroşenko ise Herson vilâyetinde cumhuriyet olmasına qoltuta.
