İşğal etilgen Qırımnı 9 biñden ziyade qırımtatarı terk etti, dep bildirdi Ukraina prezidentiniñ qırımtatar halqı işlerinden vekâletlisi Mustafa Cemilev Kiyevdeki matbuat konferentsiyasında.
«Bizler qaçaqlar meselelerinen oğraşqan BMT Yuqarı komissariatınıñ malümatına esaslanamız. Lâkin olar da tam degiller. Anda berilgen raqamlarğa köre, işğal etilgen Qırım ve Aqyarnı umumen 19 biñ kişi terk etti, olarnıñ yarısından ziyadesi ise – qırımtatarlar eken», – dedi Cemilev.
Dekabr 22-de Kiyevde «Qırımtatar halqınıñ Ukrainanınıñ tamır halqı olaraq aqlarını temin etüvde ukrain yolu» mevzulı konferentsiya keçirile.
Tedbir maqsadı – qırımtatar meselesini VIII çağırılış Yuqarı Rada içün aktual etmek ve icra akimiyet organları tarafından bar olğan qanunlarını amelge keçirmektir.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
