Link açıqlığı

Cemilev: işğalciler ukrain akimiyeti qırımtatarlarnıñ aqları qoruvında yapqan hatalarını qullana


Çerik asır devamında ukrain akimiyeti qırımtatarlarnıñ aqları qoruvında muvafaqiyetlerge irişip olamadı, bundan şimdi Qırımnıñ işğalci akimiyeti faydalana.

Bunı Kiyevde keçirilgen konferentsiya devamında Ukraina prezidentiniñ qırımtatar halqınıñ işleri boyunca vekâletli Mustafa Cemilev bildirdi, dep haber ete Qırım.Aqiqat mühbiri.

«Olar (Qırım akimiyeti – muar.) qırımtatarlarnıñ yıllar devamında çezilmegen meselelerini çezmege vade eteler. Amma buña kimse inanmay. Çünki olarnıñ sözleri işlerinden farqlana», – dedi Cemilev.

Onıñ sözlerine köre, qırımtatar halqınıñ statusını pekitecek bir qanunnıñ olması kerek. Cemilev qayd etkeni kibi, bu qanun olmağanından sebep, qırımtatarlarnıñ aqları sıñırlıdır.

«Qanun olmağanından sebep, Qurultay ve Meclis qanunsız olaraq tanıla edi ve qırımtatarlarnıñ temsilciligi akimiyette yeterli derecede degil edi. Bu da işğalciler tarafından qullanılğan edi», – dedi qırımtatarlarnıñ milliy yetekçisi.

Bazarertesi künü, dekabr 22-de, saat 10:00, «Kiyev-Mogilân akademiyası» Milliy universitetinde «Qırımtatarlarnıñ, Ukraina tamır halqı olaraq, aqları teminlevinde ukrain yolu» serlevalı konferentsiya başlandı.

Tedbir maqsadı – VIII çağıruv Ukraina Yuqarı Şurasınıñ uquq çıqarıcı faaliyeti içün qırımtatar meselesini aktual etmek ve uquq qaidelerini icraiy akimiyet organları tarafından amelge keçirmektir.

XS
SM
MD
LG