Bazarertesi künü, dekabr 22-de, saat 10:00, «Kiyev-Mogilân akademiyası» Milliy universitetinde «Qırımtatarlarnıñ, Ukraina tamır halqı olaraq, aqları teminlevinde ukrain yolu» serlevalı konferentsiya başlandı.
Tedbir maqsadı – VIII çağıruv Ukraina Yuqarı Şurasınıñ uquq çıqarıcı faaliyeti içün qırımtatar meselesini aktual etmek ve uquq qaidelerini icraiy akimiyet organları tarafından amelge keçirmektir.
Konferentsiyağa Ukraina ve Qırımnıñ cemiyet ve siyasiy erbapları, tarih ve uquq taqiqatçıları, devlet hızmetçileri, uquq çıqarıcı ve icraiy akimiyetiniñ vekilleri davetli edi. Tedbirden evel, qırımtatarlarnıñ milliy yetekçisi Mustafa Cemilev jurnalistler ile subetleşti.
Tedbir teşkilâtçıları: «Kiyev-Mogilân akademiyası» Milliy universiteti, Ukraina Nazirler Kabineti Kâtibiyetiniñ Qırım ve Aqyar sualleri boyunca Departament, Ukraina prezidenti yanında qırımtatarlarnıñ işleri boyunca vekâletli Mustafa Cemilev.
