Link açıqlığı

Saatnıñ esas haberi

Aksönovnıñ sabıq muavini Cemilev ve Çubarovnı Qırımğa nasıl şartlar ile kirseteceklerini aydınlattı


Mustafa Cemilev ve Refat Çubarov
Mustafa Cemilev ve Refat Çubarov

Qırımtatar halqınıñ lideri Mustafa Cemilev ve Qırımtatar Milliy Meclis reisi Refat Çubarov Rusiyege qarşı bir şey aytmasalar, Qırımğa kirip olurlar.

Böyle bir fikirni Qırım baş naziriniñ sabıq muavini, Tataristan Cumhuriyetiniñ Qazahistandaki vekâletli temsilcisi Rustam Temirgaliyev «Dojd» telekanalınıñ efirinde seslendirdi. Qayd etmeli ki, «Dojd» telekanalında Temirgaliyevni Rusiye prezidenti yanında Rusiyeniñ halq hocalığı ve devlet idaresi akademiyasınıñ ilmiy hadimi olaraq taqdim ettiler.

«Maña köre, olarğa (Mustafa Cemilev ve Refat Çubarovğa – muar.) qaytmaq fursatını bermeli, olarnı muzakere masası başına oturtmalı, munaqaşa kerek, olarğa kendi noqtaiy nazarını bildirmege fursat bermeli. Bizim, Rusiye tarafınıñ, olarğa qırımtatarlar içün Rusiyede bir de bir telüke olmağanını isbatlamaq içün delilleri çoq», – dedi Temirgaliyev.

Alıp barıcı qırımtatar halqınıñ liderlerini Qırımğa kirsetmeyler degende, baş nazirniñ sabıq muavini şunı dedi ki: «Olar munaqaşağa azırlar».

«Bilem ki, Çubarovnen bir de bir mesleatlar keçirilgen edi, lâkin olarnıñ tarafından da barışıqsever laflar olmalı, çünki olar Rusiyege qarşı sert bir siyasetni alıp baralar. Bugün bu vaziyette böyle aytqanlarından soñ olarnen laf etecek bir şey yoq. Bizler olarnen muzakerege başlamağa azırmız. Lâkin olar da biraz riayetkâr olmalılar, iç olmasa bunıñ kibi sert laf etmemek kerekler», – dedi Temirgaliyev.

Malüm ki, Rusiye akimiyeti Mustafa Cemilev ve Refat Çubarovğa beş yıl devamında Qırımğa kelmelerini yasaq etti.

XS
SM
MD
LG