«Krımenergo» müessisesi qazaiy cedvelni işke tüşürgen soñ yarımadanıñ bazı şeer ve rayonları bir qaç saatke elektriksiz qaldı.
Açuvlanğan adamlar fikirlerini içtimaiy ağlarda bildirdiler.
«Menim evimde tam 7 saat devamında ışıq yoq edi. GUP «Krımenergo», bu serttir» – dep yazdı Aqmescit sakini Zera Emirsuin cuma künü, dekabr 19-da, aqşam Facebook saifesinde.
Alupka sakini Sergey Psarev onıñ evinde elektrikler 6 saat olmağanını bildirdi. «6 saat devamında aç ve üşügen balalar ışıqsız oturdılar! Kim mesülietli? Böyle bir şey 15 yıl devamında olmadı!», – dep açuvlana Psarev.
Qayd etmeli ki, cumaertesi künü, dekabr 20-de, Aqmescitniñ bazı rayonları elektrik energiyasız qala.
Cuma künü, dekabr 19-da, saat 15:41 «Krımenergo» müessisesiniñ dispetçeri yarımadada elektrikni söndürüv qazaiy cedvelini qullanmağa avale etti.
Qırım yaqarlıq ve energetika naziri Sergey Yegorov bildirdi ki, bunıñ sebebi Ukrainada yarımadanı elektriyanen temin etken elektrik yollarınıñ tamiri oldı.
