Amerika Qoşma Ştatlarınıñ prezidenti Barack Obama Rusiye işğal etken Qırımnen bağlı bir sıra cezalar buyruğını imzaladı.
AQŞ Maliye nazirligi saytında derc etilgen emir metnine binaen, Amerika malı, tehnologiya ve hızmetleriniñ Qırımğa ihracı yasaq etile.
Amerikanıñ Qırım yatırımları, em de andan mal ve hızmet itali yasaq etile, dep haber ete Radio Svoboda.
Berilgen malümatqa köre, yuqarıdaki adımlar AQŞ Rusiyeniñ Qırım işğalini tanımağanlarını isbatlamaq içün atıla. «Men kene de Rusiyeni işğal ve Qırımnı zapt etmek ıntıluvlarını, şarqiy Ukrainada separatistlerge qoltutuvnı toqtatmağa ve Minsk añlaşmalarına köre areket etmege çağıram», – aytıla Barack Obamanıñ beyanatında.
Prezident emri AQŞ Maliye nazirliginiñ AQŞ ükümetiniñ zanınca Ukrainada vaziyetniñ kerginleşmesine alâqası olğan şahsiyet ve teşkilâtlarnı cezalamaq aqqı bar.
Maliye nazirliginiñ malümatına köre, ceza cedveline 24 Rusiye ve Ukraina vatandaşı ve bir qaç şirket, şu cümleden Rusiye iş adamı Konstantin Malofeyevge ait olğan Marshall Capital Partners yatırım şirketi kirsetildi. Cedvelde Qırım prokurorı Natalya Poklonskaya, «Noçnıye volki» baykerler klubı, DNR ve LNR öz başına ilân etilgen «cumhuriyetleriniñ» yolbaşçıları Aleksandr Zaharçenko ve İgor Plotnitskiy, «Novorossiya» «parlament reisi» Oleg Tsarev ve digerleri de bar.
Olarğa AQŞna kiriş yasaq etile, AQŞ vatandaşlarına ise olarnen bir de bir iş tutmağa yasaqtır.
