Bağçasaray tarihiy-medeniy qoruğınıñ (BTMQ) baş müdiri vazifesinden boşatılğan Elmira Ablâlimovanıñ aqayı olğan Qırımtatar Milliy Meclisiniñ reis muavini Ahtem Çiygoznıñ fikirince, işbu qarar siyasetnen bağlı.
Böyle bir fikirni o Qırım.Aqiqatqa seslendirdi. «Cumhuriyetniñ şimdiki akimiyetine, añlağanımızğa köre, mütehassıslar degil, olarnıñ aytqanlarını yapacaq insanlar kerek», – dedi Çiygoz.
Onıñ bildirgenine köre, soñki beş ay devamında Bağçasaray qoruğında «teşkerüvler biri-biri artından keçirilgen edi».
Çiygoz emin ki, onıñ qırımtatar halqınıñ aqlarını qoruv yolunda areketlerinden sebep ilk evelâ onıñ tuvğanları zarar köre. «Menim qız qardaşıma – o, şuralardan birinde muasebeci olıp çalıştı – reorganizatsiya sebebinden işten çıqmağa teklif ettiler. Apayımnen de aynı vaziyet – bu siyasiy bir qarardır. Menim küçük qızıma da reorganizatsiya sebebinden işten çıqmağa teklif ettiler, lâkin Bağçasaray memuriyetiniñ yolbaşçısı İgor Knır sayesinde, o, belki de, iş yerini saqlap qaldırdı», – dedi Çiygoz.
Qırım.Aqiqat berilgen malümatqa köre, BTMQ baş müdiri vazifesine Vadim Martınük tayinlendi. O, BTMQ müdiriniñ iqtisadiyat meselelerinden muavini olğan edi.
