Belli ukrain yırcısı, qırımlı Camala Kiyevde, dekabr 24 künü, işğal etilgen Qırım ve Donbasstan köçip kelgenler ile körüşecek. Bu aqta öz Facebook saifesinde Krım-SOS cemaat teşebbüsi bildire.
«Camalanıñ köçip kelgenler ve şeer sakinleri ile körüşüvine davet etemiz (bedava)! Yırcı öz ayatiy ve icadiy yolu aqqında tarif eter. Musafirler öz suallerini qoya bilecek, Camala ise, öz nevbetinde, oña ilham bağışlağan şeyler ve «Povodır» filminden çıqarğan tecribesi aqqında tarif eter. Bunıñ ile körüşüv çerçivesinde yırcınıñ avtograf-sessiyası keçecek»,– denile beyanatta
Krım-SOS cemaat teşebbüsi haber etkeni kibi, Qırım ve Donbasstan mecburen köçip kelgenler körüşüvge qayd etilmek ve daa da tafsilâtlı malümatnı bilmek içün teşkilâtnıñ saytına kire bile.
Camalanıñ özü ise Facebook saifesinden köçip kelgenlerni körüşüvge davet eter eken, avtograf-sessiyası ve onıñ ile subet olacağı aqqında haber ete.
«Dostlar, dekabr 24 künü, Kiyevde Qırım, Donetsk ve Lugansk vilâyetlerinden mecburen köçip kelgenler ile körüşecegim. Subetleşirmiz, suallariñizge cevap beririm. Kontsertten soñ imzamnı alıp olamağanlar içün aftograf sessiyası keçirilecek. İstegenlerni davet etem»,– dedi Camala.
Tedbir Smolenskaya soqağı, 31-33 adresi boyunca yerleşken «İnkom» biznes-merkezinde saat 19:00 başlanacaq.
Malüm olğanı kibi, belli ukrain yırcısı, qırımlı Camala, dekabr 12 künü, StereoPlaza büyük kiyev kontsert salonında kontserti ile çıqışta bulundı. Seyircilerniñ çoqusı işğal etilgen Qırım ve Donbass sakinleri olıp, kontsertke Krım-SOS cemaat teşebbüsinden elde etken bedava davetnameler ile kelgen edi.
