Rusiye prezidenti Vladimir Putin Rusiye Silâlı quvetlerine «Qırım adiseleri vaqtında zenaat utsalığını köstergeni» içün minnetdarlığını bildirdi. Bu aqta o, cuma künü, dekabr 19-da, Rusiye mudafaa nazirliginiñ toplaşuvında ayttı.
«Qırım adiseleri vaqtında cesürlik ve zenaat ustalığını köstergen Silâlı quvetleriniñ yolbaşçılığına, şahsiy erkânğa ve bölüklerge minnetdarlığımnı bildirmege isteyim», – dedi Putin.
O şunı da qayd etti ki, Rusiye arbiy hızmetçileri «yarımadanıñ sakinlerini büyük qazadan – qan töküvden ve gumanitar felâketten qorçaladı, referendum vaqtında vatandaşlarğa iradelerini serbest şekilde bildirmege imkân berdiler».
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
