İşğal etilgen Qırım sakinlerine «soñunaca vatanperver olmağa» ve aqçalarnı rublelerde tutmağa teklif ettiler. Bunı Qırım esabat palatasınıñ reisi Anatoliy Zaiçenko Aqmescitte dekabr 19 künü keçirilgen matbuat konferentsiyası devamında bildirdi.
Onıñ aytqanına köre, böyleliknen qırımlılar ve Rusiye Federatsiyasınıñ sakinleri memleketniñ iqtisadiyatına yardım etecekler – dep bildire Qırım.Aqiqat mühbiri.
«Vatanperver olıp, aqçalarnı rublelerde tutmağa kerek. Biz öz-özümizge inflâtsiyanı ketiremiz. Avropa memleketlerde kimse öz parasını diger memleketniñ para birleminde saqlamay. Demek, biz de aqçamızını ruble birleminde tutmalımız», – dedi Zaiçenko.
Qırım esabat palatasınıñ reisi aytqanı kibi, para çarşısı boyunca şimdi bir şey aytmağa qıyın. Çoqusı allarda vaziyet Rusiyege nisbeten Avropa birligi ve AQŞ tarafından olğan sanktsiyalarğa bağlı.
