Rusiye arbiy hızmetleriniñ hadimleri Qırımdaki «narazılıq meydanlarını» teşkerip, kendini pek sert alıp baralar. Bunı «Sebat» teşkilâtınıñ vekilleri Aqmescitteki matbuat konferentsiyasında bildirdiler, dep haber ete Qırım.Aqiqat mühbiri. Olarnıñ aytqanına köre, teşkerüvler sıq-sıq ötkerilip başladı.
«Narazılıq meydanlarınıñ» iştirakçileri bildireler ki, politsiya hadimleri esasen qaranlıq tüşkende kelip, vesiqalarını teşkereler, telefonlarını yazıp alalar.
«Er şey pek sert bir şekilde keçti. Qadınlar bizge şikâyet ettiler», – dep ayttı «narazılıq meydanlarınıñ» iştirakçilerinden biri Seydamet Gemeci.
«Sebat» faalleriniñ aytqanına köre, bunıñ kibi teşkerüvler aman-aman er bir «narazıq meydanında» keçirildi.
Faallerniñ aytqanına köre, Qırım «Devlet şurası» Qırım sakinleriniñ topraq aluv esnasını zorlaştıracaq qanun leyhalarını baqmaqta. Bundan sebep, «Sebatnıñ» fikirince, narazılıq meydanları iştirakçileriniñ tahminen 80% topraq damartısız qala bile.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
