Qırım elektrik energiyası ve suv ile temin etildi, lâkin olarnıñ fiyatları yañı yıldan itibaren artacaq. Bunı Qırım mesken-kommunal hocalığı «naziri» Aleksandr Jdanov matbuat konferentsiyasında bildirdi, dep haber ete Qırım.Aqiqat mühbiri.
«Qırımnıñ em suvı, em de ışığı olacaq. Qayd etmek isteyim ki, bu hızmetlerniñ fiyatları yañı yılda artacaq. Böylece, qızdıruv 10%-ğa artacaq, suv – 15%-ğa, çöplük çıqarılması ise 8%-ğa. Ve bu sene fiyatlar daa artacaq», – dedi o.
Onıñ bildirgenine köre, 2015 senesiniñ soñunda Qırımda tarifler Rusiyeniñ qomşu regionlarındaki derecege qadar artacaq.
Ukraina nazirler şurası işğal etilgen Qırım içün elektrik energiyasınıñ taşıyıcılarını italni evelden ödev şartlarına keçirdi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
