Link açıqlığı

Putinge sual bergen Qırım jurnalisti Rusiye prezidentine riayetkârlıq qabaatlarına cevap berdi


ATR jurnalisti Safiye Ablâyeva Vladimir Putinge sual bere

ATR birinci qırımtatar telekanalınıñ jurnalisti Safiye Ablâyeva onıñ Vladimir Putinge matbuat konferentsiyasında bergen sualini tenqid etken içtimaiy ağlarnıñ qullanıcılarına teşekkürlerini bildirdi.

«Birinciden, er bir tefsiriñiz içün sağ oluñız. Añlağanıma köre, bazıları onıñ içine bütün canını berip, kim olğanını kösterdiler. Ekinciden, er keske tenqid içün minnetdarım – sebepsiz tenqid olsa da», – dep yazdı jurnalist Facebook saifesinde.

O, Vladimir Putinniñ matbuat konferentsiyasında qırımtatarlarnıñ reabilitatsiya emirinen bağlı sual berip, Qırım akimiyeti işbu buyruqnı ne sebepten amelge keçirmegenini soradı. Jurnalist sual berip, Pütinge qırımtatarca teşekkür bildirdi. İçtimaiy ağlarnıñ bir çoq qullanıcısı Ablâyevanıñ sualinde teñkid olmağanını dediler.

Jurnalist bunıñ kibi tefsirlerniñ müelliflerine Putinge sual bermege tırışmağa teklif etti.

«Şimdi maña doğru bir nasit berecek olğan er keske şunı aytmaq isteyim ki, siz de Rusiye Federatsiyası prezidentiniñ matbuat konferentsiyasına kiriñiz, dörtünci sırada oturıñız, «baş komandannıñ» qarşısında oturıñız, sizge söz bermegende soñdan evelki sual beriñiz. Akimiyet bir şey yapmağanını aytıñız, ve menden ve bugün sual bergen zenaatdaşlarımdan daa yahşı oluñız. Emin oluñız ki, men Siziñ ve Siziñ muvafaqiyetleriñizge quvanırım», – dep yazdı jurnalist.

Rusiye prezidenti Vladimir Putin ATR telekanalınıñ sualine cevap berip, Qırım akimiyetini qırımtatarlarnıñ reabilitatsiyası aqqında buyruqnı amelge keçirmege çağırdı. Onıñ aytqanına köre, Rusiyeniñ federal akimiyeti qırımtatarlarnıñ kendisini Rusiye vatandaşları olaraq is etmeleri içün qanun derecesinde er şey yaptı, şimdi yarımadanıñ yerli akimiyeti qanunnı amelge keçirmeli.

XS
SM
MD
LG