Link açıqlığı

Zaur Smirnov: akimiyet bulunuv izni bitken qırımtatarlarnı sürgün etmeycek


Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» reisi Zaur Smirnov

Regionda bulunuv izni bitken vatandaşlarnı Qırımdan sürgün etmeycekler. Bunı Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» reisi Zaur Smirnov.

Böyle etip o, İnsan aqları boyunca Qırım alan missiyasınıñ (QAM) beyanatına cevap berdi. QAM işğal etilgen Qırım akimiyeti bulunuv izni bitken Orta Asiyadan kelgen repressiyalarğa oğratılğan qırımtatarlar ve diger halq temsilcilerini sürgün etecek, dep bildirgen edi.

«Bazı kütleviy haber vastaları Qırım akimiyeti Orta Asiya memleketlerinden kelgen ve bulunuv izni bitken repressiyalarğa oğratılğan biñlernen qırımtatarı ve diger halq temsilcilerini sürgün etecekler degen haberni aydınlatqan ediler. Men bu matbuat vastalarına muracaat etmege isteyim: siz başta akimiyetten soruñız da, soñra ise matbuatta bastırıñız. Yalıñız kerçek malümatlar aqqında yazıñız, qavğa, dubara artıq mot degil», – dep tekrarlay Smirnovnıñ aytqanlarını «Goskomnats» matbuat hızmeti.

Smirnovnıñ bildirgenine köre, Qırım «yolbaşçısı» Sergey Aksönov da Qırımdan bir kimse sürgün etilmeycegini ayta. Smirnov emin ki, repressiyalarğa oğratılğan grajdanlarnıñ yarımadada bulunuv müddetini arttırmaq içün qanuniy tedbirler alıp barılacaq.

XS
SM
MD
LG