Rusiye prezidenti Vladimir Putin matbuat konferentsiyasında qırımtatar halqınıñ reabilitatsiyası aqqında aytıp, qırımtatarlarnı qasevetlendirgen eñ müim meselelerge diqqat ayırmadı. Böyle bir fikirni Qırımtatar Milliy Meclis reisiniñ muavini Nariman Celâl Qırım.Aqiqatqa seslendirdi. Onıñ qayd etkenine köre, onıñ semetdeşlerini qırımtatar halqını tamır halq olaraq eñ çoq siyasiy-uquqiy statusı raatsızlay, buña ise Putin emiyet bermedi.
«Prezident Qırımda er kes bu emirniñ amelge keçirilmesinen razı olmağanını aytmaq istedi. Lâkin mında şunı añlamaq kerek ki, bu adımlarğa baqmadan, belli bir maddeler ömürge keçirilmeli, Qırımda bunıñnen bağlı problemler bar», – dep ayttı Meclis reisiniñ muavini.
Onıñ bildirgenine köre, işğal etilgen Qırım akimiyeti devlet müessiselerdeki blanklarnı üç tilde bastıra.
«Lâkin menim içün bu, doğrusını aytsam, ana tilimniñ saqlanmasına yardım etmey. Bu yalıñız tışqı işaret. Qırımtatar levhalarımı? Yahşı. Lâkin episi bular ana tiliniñ saqlanmasına eñ az fayda ketire. Qırımtatar tilinde tasil problemleri bar olğanı aqqında sualge prezident zornen cevap berir edi», – dep qayd etti Celâl.
Rusiye prezidenti qırımtatarlarnıñ reabilitatsiyası aqqında emirni amelge keçirmege çağırdı. Rusiyeniñ federal akimiyeti qırımtatarlarnıñ kendisini Rusiye vatandaşları olaraq is etmeleri içün qanun derecesinde er şey yaptı, şimdi yarımadanıñ yerli akimiyeti qanunnı amelge keçirmeli.
