İşğal etilgen Qırımda, Bağçasaray tarihiy-medeniy qoruğınıñ baş müdiri deñişti: sabıq yolbaşçı Elmira Ablâlimova işten boşatıldı. Bu aqta Qırım.Aqiqat mühbirine Bağçasaray müzeyiniñ hadimleri bildirdiler.
«Resmiy malümatqa köre, Elmira Ablâlimova ile kelecek senege muqaveleni uzatmadılar. Hadimler müessiseniñ ğayrıdan qayd etilüvi sebebinden işten çıquv aqqında ariza yazğanlar. O, müzeyni endi terk etti», – dep añlattılar Qırım.Aqiqat mühbirine müzey hadimleri.
Yañı baş müdir vazifesine evel Bağçasaray tarihiy-medeniy qoruğınıñ iqtisadiy meselelri boyunca müdir muavini olğan Vadim Martınük tayin etildi.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
