Link açıqlığı

Qırımda «ermeni işi» boyunca yaqalanğan Edem Ebulisov azat etildi


2014 senesi mayıs 3 künü Ermeni Bazarda qırımtatarlarnıñ milliy lideri Mustafa Cemilevni qarşılav tedbiri vaqtında politsiya hadimine nisbeten küç qullanuvında şeklengen Aqmescit sakini Edem Ebulisov SİZOdan çıqtı. Qırım.Aqiqat mühbirine uquq qoruyıcı Emil Kürbedinov aytqanı kibi, onı dekabr 17 künü azat ettiler.

Bu malümatnı Ebulisovnıñ tuvğanları tasdiqladılar. Olar şunı da bildirdiler ki, Rusiye Federatsiyası Cinaiy kodeksiniñ 318 maddesi («Akimiyet temsilcisine zarar ketirüv») başqasına deñiştirilgen.

2014 senesi mayıs 3 künü numayışta iştirak etken 4 qırımtatarı yaqalanğan edi, olardan soñ nevbette Edem Ebulisov azat olundı.

Hatırlatamız, yaqında SİZOdan Tair Smedlâyev, Musa Apkerimov, Rustam Abdurahmanov azat etildiler. Bu işler boyunca mahkemeden evel taqiqatlar devam ete.

Qırım.Aqiqat haber etkeni kibi, işğal etilgen Aqmescitniñ Kiyev rayon mahkemesi 2014 senesi noyabr 26 künü yaqalanğan Edem Ebulisovğa 2 aylıq apis cezasını belgilegen edi. Aqmescit sakini, 1970 senesi doğğan Edem Ebulisovnı noyabr 25-de yaqaladılar.

Taqiqat malümatına köre, Ebulisov bu sene mayıs 3-te Ermeni Bazarda qırımtatar halqınıñ lideri Mustafa Cemilevni qarşılarken, Rusiye politsiyasınıñ mahsus bölük hadimini bayraq tayağınen urdı.

XS
SM
MD
LG