Link açıqlığı

Qırım Apellâtsion mahkemesi «Qırım» Fondu» hayriye teşkilâtına 4,5 mln ruble para cezasınıñ belgilenüvi boyunca işni ögrenmege başladı. Qırım.Aqiqat saytınıñ mühbiri bergen malümatqa köre, cumaаqşamı, dekabr 18 künü, birincі toplaşuv keçirildi.

Hatırlatamız, Qırımnıñ medeniy miras qoruv «Devlet komiteti» tizgen memuriy protokolğa binaen, «Qırım» Fondu» hayriye teşkilâtınıñ reisi Riza Şevkiyev KoAP RF 7.13 1 maddesine köre (Rusiye Federatsiyası halqlarınıñ medeniy miras obyektleriniñ devlet imayesi ve qullanuv talaplarını bozuv) memuriy cinayet yaptı.

Bu maddege köre, teşkilât reisi 350 biñ rublelik para cezasını ala bile, «Qırım» Fondu» ise – 4,5 million rublelik.

Bundan ğayrı, sentâbr ayında, Aqmescit Merkeziy rayon mahkemesi «Qırım» Fondunı yedi adres boyunca yerleşken mal-mülkini, şu cümleden Şmidta soqağındaki Meclis binasını qullanmağa yasaq etti, bank esaplarını qapattı ve yañı esaplarnı açmağa yasaq etti.

Hayriye teşkilâtınıñ başı Riza Şevkiyev Qırım.Aqiqatqa aytqanı kibi, Apellâtsion mahkemeniñ toplaşuvı vaqtında Fondnıñ temsilcisi üç muracaatnı seslendirdi.

«Birinciden: toplaşuvnıñ avuştıruvı aqqında muracaatımız bar edi. Ekinciden: toplaşuvnı qırımtatar tilinde keçirmek ve üçüncisi: prokurornıñ ya da prokuratura temsilcisiniñ olmasını temin etmek, çünki nezaret müessise tarafından teşkerüvler keçirile edi (iş boyunca – muar.)»,– tarif etti Şevkiyev.

O şunı da qayd etti ki, «mahkemeci, ne içündir, toplaşuvnıñ yanvarniñ soñuna keçirilmesi ile birden razı oldı».

«Bundan qasevet çekemiz, añlaşılmağan bir şey yüz bere, böyle olmamaq kerek. Mahkemeci bir qaç kün bere bile edi – buña azırlana edik, amma toplaşuvnı yanvarniñ soñuna avuştırdı»,– dedi Şevkiyev ve şu yerde «müsbet ceyeetni» körgenini qayd etti.

Qırım.Aqiqat bergen malümatqa köre, salı künü, dekabr 16-da, Riza Şevkiyevniñ şikâyeti boyunca birindci toplaşuv keçirilgen edi. O vaqıt aynı böyle muracaatlar baqıldı.

Nevbetteki toplaşuv dekabr 23 künü keçirilecek.

XS
SM
MD
LG