İşğal etilgen Qırımda imkânları sıñırlı olğan bala, ösmür ve gençlerge dekabr 18 künü «Pregrad.net» Mukâfatını taqdim ettiler. Bu aqta Qırım ükümetiniñ matbuat-hızmeti Facebook saifesinde bildirdi.
Qırımnıñ çeşit regionlarından kelgen 25 iştirakçi ğalebe qazandı, olarğa kup ve qıymetli bahşışlar berildi.
Tedbir Qırımnıñ öz başına etilgen baş naziri Sergey Aksönovnıñ iştiragi ile Qırım Cumhuriyetiniñ Devlet akademik muzıkalı teatrinde keçirildi.
«Er birimiz istidatlımız, büyük insan olmağa ve öz ğayretiñizni köstermege imkânlarıñız bar. Menimce, bu kibi tedbir ve yarışlar reqabetni pekitmek ve eñ istidatlı balalarnı seçmege bizge yardım eter. Biz er yıl böyle tedbirlerni keçirecek olamız. Ükümet tarafından destek olacaq», – dedi Aksönov.
O şunı da bildirdi ki, Qırım tasil, ilim ve gençlik «nazirligi», emek ve içtimaiy qoruv «nazirligi» Umumrusiye halq frontu ile imkânları sıñırlı olğan gençlerniñ destegi boyunca leyhalarnı işlep çıqara ekenler.
«Balalarımızğa qol tutmalımız. Qırım ve Rusiyeniñ küç ve ğururıdır. Er bir sağlam insan özüni bu balanıñ yerine qoymaq ve onıñ vaziyetini añlamağa tırışmalı. Şimdi memleketmizide er kes öz eyi taraflarını, yaqınlarğa sevgini köstermek kerek. Birlikte olsaq, bir şeyden qorqmağa acet olmaz. Bu balalar ayatta er şeyni yeñmek mümkün olğanını köstereler», – dedi Sergey Aksönov.
Belli olğanı kibi, tantanalı tedbir Umumrusiye halq frontu ve Qırım gençler birligi teşebbüsi ile keçirildi.
