Link açıqlığı

Ukraina mektep talebeleriniñ çoqusı Rusiyeniñ Qırım işğaline baqmadan, yarımada Ukrainağa qaytarılacaq memleketniñ bir qısmı olaraq tanıy.

Bunı «Ukraina glazami detey» Gorşenin İnstitutınıñ içtimaiy tedqiq neticeleri köstere, dep haber ete LV.ua.

Mektep talebeleriniñ 41,7% Qırım aqqında ne tüşünesiñiz sualine bu Ukraina territoriyası olğanını aytıp, onı qaytarmaq kerekligini qayd etti. Sorav iştirakçileriniñ 23,6% bildirdi ki, Qırım – Rusiye tarafından işğal etilgen topraqtıp.

Mektep talebeleriniñ 6,7% qırımlılarnı memleket satqınları dep adladı, 5,3% yarımada qırımtatarlarnıñ etnik toprağı olğanını dedi.

Mektep talebeleriniñ 42,6% Rusiyege menfiy davrana. Böylece, olardan 25,4% bu memleketniñ prezidenti yaramay olğanını dedi, 15,6% bu istilâcı memleket olğanını dedi. Mektep talebeleriniñ 10% emin ki, eskiden Rusiye qardaş bir memleket olsa, şimdi duşman oldı.

Tedqiqni 2014 senesi avgust ayında Gorşenin İnstitutı ve MDTs «Artek-Karpatı» keçirdiler. Balalarğa teklif etilgen bir sıra mevzu boyunca yazma işini yazmağa teklif ettiler. Umumen tedqiqte Ukrainanıñ er bir vilâyetinden 1050 mektep talebesi iştirak etti.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG