Rusiyeniñ iqtisadiyat buhranı Qırım işğaliniñ cezası degil, Ğarpnıñ Rusiye Federatsiyasınıñ mustaqilligini «basmaq» istegidir, dep ayttı Rusiye prezidenti Vladimir Putin cumaaqşamı künü Moskvadaki matbuat konferentsiyasında, dep haber ete Qırım.Aqiqat.
«Bu Qırım cezası degil, bu millet, medeniyet, devlet olaraq kendini qorumaq istegimiz içün cezadır», – dedi Putin.
Onıñ aytqanına köre, Ğarpta Rusiye er angi areket içün «problemalar, qarşılıq ve küreşke» rastkele.
Soñra Putin Rusiyeniñ timsali olğan ayuv aqqnda fikir yürsetmege başladı.
«Bazıda ayuvımız raat otursa, taygada domuzlarnı aydamasa, yemiş, bal aşasa, belki de, soñra onı raat qaldıracaqlar, dep tüşünem. Raat qaldırmazlar. Er zaman onı zıncırğa bağlamağa tırışacaqlar, zıncırğa oturtqan soñ ise – tiş, tırnaqlarnı da tartıp alırlar... Tırnaq ve tişlerni alğan soñ ise ayuv da kerek olmaycaq. Ondan bir teri yaparlar ve oldı. Qırımnıñ alâqası yoq. Mesele şunda ki, bizler kendi mustaqilligimizni qorumaq isteymiz», – dedi Rusiye lideri.
«Meksikanıñ Tehasını almaq – adaletli eken, bizim kendi toprağımızğa saip çıqmamız ise – adaletsizmi?», – dep ayttı Putin.
Avropa Birligi ve AQŞ Ukraina istilâsı sebebinden Rusiyege qarşı kirsetken cezalarğa cermay fiyatınıñ ucuzlaşması da qoşula. Malüm ki, cermay ve gaz Rusiye bücetine kâr ketirgen esas qaynaqlardır. Bunıñ neticesinde de Rusiye rublesi ep tüşmekte.
