Hersonda dekabr 24-te «Herson vilâyeti sıñır civarı olaraq» mevzusında tögerek masa ötkerilecek. Tedbir maqsadı – Qırım yarımadasınıñ vaqtınca işğali sebebinden regionda peyda olğan meselelerni aydınlatmaqtır.
Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti bildire.
Tedbirge devlet akimiyet organları, yerli idare organlarınıñ vekilleri, cemaat ve siyasiy erbapları, ilmiy tedqiqçiler qoşulması beklenile.
«Tögerek masada munaqaşa esasında Herson ve Herson vilâyetinde 2015 senesi yanvar-fevral devamında amelge keçirilecek leyhalar cedveli tizilecek», – bildire matbuat hızmeti.
Böylece, Herson vilâyetiniñ iqtisadiy, gumanitar tarafları ve havfsızlıq tarafları muzakere etilecek.
İşbu tedbir teşkilâtçıları Ukrainadaki Büyük Britaniya Elçihanesiniñ qoltutuvı ile «Ukrain Barıştırıcı Mektebi» ve Ukraina prezidentiniñ Qırımdaki temsilciligi, em de Ukraina prezidentiniñ qırımtatar halqı işlerinden vekâletlisiniñ qoltutuvı ile keçirile.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
