Dekabr 18-de saba Keriç keçitiniñ yük ve yolcu yollarında 400 maşina nevbette tura. Kün devamında Keriç boğazında yel süratınıñ artmasını bekleyler.
Bunı Keriç keçitiniñ işini kontrol etken Yekâne transport müdirligi bildire.
«Al-azırda Keriç keçitinde yel süratı saniyede 10 metrni teşkil ete. Lâkin, kün devamında yel süratı saniyede 12-15 metrni teşkil etmesi mümkün. Dört parom çalışa «Glukofilousa», «Nikolay Aksenenko», «İonas» ve «Olimpiada», – bildire müdirlik.
Berilgen malümatqa köre, «Kavkaz» limanında 10 yengil ve 40 yük maşinası nevbetini bekley, «Qırım» limanında – 10 yengil ve 20 yük maşinası. Yük yolunda «Novorossiysk» limanında 107 maşina, Slavânsk-na-Kubani 227 yük maşinası, Keriç ava limanında 70 maşina bekley.
Tünevin 2000 maşina ve tahminen 5500 yolcu alıp ketirildi.
Qırım transport «nazirligi» vatandaşlar Keriç keçiti meseleleri boyunca muracaat ete bilecek «acele ağnı» açtı.
Bundan evel Qırımnıñ «baş naziri» Sergey Aksönov keçitte nevbetler olmamaq kerekligini qayd etip, Keriç parom keçitiniñ iş planını tizmege avale etken edi.
