Kelecek sene işğal etilgen Qırımnıñ «halq imayesine» eñ azından 20 biñ rublelik aylıq berecegini vade eteler. Bunı «Krım Media» «samooborona» matbuat hızmetiniñ reberi Sergey Bagayevniñ aytqanlarına esaslanıp bildire.
Onıñ aytqanına köre, aylıq parası cumhuriyet bücetinden ayırılacaq. Umumen 2015 senesi «samooborona» ştabına, nizam qoruması ve devlet sıñırınıñ imayesine 258 mln. ruble ayırılacaq.
Neşir malümatına binaen, Bagayevniñ aytqanına köre, bu para hızmet tehnikası: maşina, avtobus, yük maşinaları ve BTRlerge de sarf etilecek.
Aynı vaqıtta o alınacaq tehnikanıñ sayısını aytmadı.
«Şimdilik aytıp olamayım – añlaysıñız da, ciddiy bir iş ve tez al etilmey», – dep qayd etti o.
Noyabr 26-da Qırımda «halq imayesi», yani «samooborona» kibi belli olğan Halq müfrezesi Ştabını devlet müessisesi statusından marum qaldırdılar. Endiden soñ olar uquq qoruyıcılarğa Qırımda nizamnı imaye etmege yardım etecek ekenler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
