Ukraina er bir devlet ile keçirgen muzakerelerde işğal etilgen Qırım sakinleri çetelge Rusiye Federatsiyası bergen çetel pasportları boyunca çıqmamaq kerekligini ayta.
Bunı Ukraina Tışqı işler nazirliginiñ siyaset ve bağ departament yolbaşçısı Aleksey Makeyev Qırım.Aqiqatqa bildirdi.
Onıñ aytqanına köre, bir de bir devlet qırımlılarnı Rusiye çetel pasportı ile qabul etse, bu adım dost adımı olaraq tanılmaycaq.
«Bunı bizler er bir paytahtqa bildirgen edik. Konsullıqlarımız qırımlılar Rusiye çetel pasportları ile kirelermi-yoqmı kontrol etip olamaylar. Lâkin bizim elçihanelerimiz paytahtlarğa bunıñ kibi pasportlar işğalge oğrağan regionda berilgenini yetkizeler», – dedi Makeyev.
Onıñ qayd etkenine köre, Ukrainanıñ esas iş ortağı Avropa birligi ile işğalden soñ Qırım Muhtar Cumhuriyetinde berilgen pasportlar Avropa birligi memleketlerinde qanunsız olaraq tanılacaq, dep añlaştılar.
İşğal etilgen Qırım sakinlerine Krasnodar ülkesinde qayd etilgen Rusiye çetel pasportlarını berip, ğarp memurlarını aldatacaq olalar.
Rusiyeniñ Qırım işğalini tanımağan Avropa birligi, AQŞ ve diger memleketler Rusiye çetel pasportı olğan Qırım sakinlerini kirsetmeyceklerini bildirgen ediler. Vizanı yalıñız Ukraina çetel pasportları boyunca berecekler.
