Qırımtatar yazıcınıñ şeyleri olğan Aqmescit civarındaki hastahanede FSB tintüvi – «Qırım» Fondu» reberliginiñ diqqatını teşkilâtqa qarşı olğan mahkemelerden ayırmaq içün bir sebeptir, dep tüşüne Riza Şevkiyev.
Bunı o, tintüvniñ bitkeninden soñra, Qırım.Aqiqat mühbirine añlattı.
Onıñ sözlerine köre, al-azırda «Qırım» Fondı» ve onıñ reberligi boyunca beş mahkeme davası bar eken.
«FSB bizni mahkemelerden çekmek, vaqtımıznı almaq ve bizge mahkemelerge olduqça eyi seviyede azırlanmaq içün fırsat bermemek maqsadı ile qoşma tintüvlerni keçire»,– dey Şevkiyev.
O şunı da qayd etti ki, FSB hadimleri tintüvni ğayet sert sürette keçire edi, amma matbuat vastalarınıñ temsilcileri kelgenden soñra vaziyet deñişti, uquq qorçalayıcılar özlerini mulâyim şekilde alıp barmağa başladı.
Amma jurnaistlerge öz izaatlarını FSB hadimleri bermege razı olmadılar.
Qırım.Aqiqatqa «Qırım» Fondu» hayriye teşkilâtınıñ başı Riza Şevkiyev aytqanı kibi, çarşenbe künü, dekabr 17-de, FSB hadimleri Aqmescit rayonınıñ Colman (Pionersoke) köy hastahanesinde türk dünyasında belli olğan qırımtatar yazıcısı Cengiz Dağcınıñ şahsiy şeyleri olğanı sebebinden tintüvni keçirmekteler
Olar maddelerge esaslanıp, yükniñ elastı aqqında qararnı seslendirdiler ve cinaiy iş açılacağı aqqında haber ettiler. Fondnıñ reisi Qırım.Aqiqatqa añlatqanı kibi, bu mülk boyunca SBU daa Qırım işğalinden evel sorğularnı keçire edi, amma o vaqıt bütün meseleler çezilgen edi.
Şevkiyevniñ aytqanına köre, Cengiz Dağcı beş yıl evelsi İngliterede elâk oldı, şeyleri ise Fondda saqlansın ve ileride qırımtatarlarnıñ facialı taqdiri aqqında romanlarnıñ müellifine müzey açılsın dep, Qırımğa türk arqadaşları tarafından ketirildi.
