Qırımtatar yazıcısınıñ şeyleri olğan qırım hastahanesinde Federal havfsızlıq hızmetiniñ tintüvi devam etmekte.
Qırım.Aqiqat mühbiri bergen malümatqa köre, mında Meclis azaları keldi, olarnıñ arasında Qırımtatar milliy Qurultayınıñ Merkeziy Saylav Komissiya reisi Zair Smedlâyev ve adliyeci Emil Kürbedinov.
Yüz bergen adise aqqında tafsilâtlı izaatlarnı şimdilik kimse bermey, Smedlâyev «er şey mahsus etilgenini» qayd etti.
FSB hadimleri ise jurnalistlerge tintüvni videoğa çekmege izin berdiler. Tintüv vaqtında 36 qapalı qutunı sayıp çıqtılar.
«Olar binadan qutularnı çıqarıp, teşkere ediler, şimdi er şeyni yerlerine qaytarmağa isteyler, şunıñ içün matbuat vastalarınıñ temsilcilerini binanı terk etmege çağırdılar»,– dep añlattı Qırım.Aqiqat mühbiri.
Qırım.Aqiqatqa «Qırım» Fondu» hayriye teşkilâtınıñ başı Riza Şevkiyev aytqanı kibi, çarşenbe künü, dekabr 17-de, FSB hadimleri Aqmescit rayonınıñ Colman (Pionersoke) köy hastahanesinde türk dünyasında belli olğan qırımtatar yazıcısı Cengiz Dağcınıñ şahsiy şeyleri olğanı sebebinden tintüvni keçirmekteler
Olar maddelerge esaslanıp, yükniñ elastı aqqında qararnı seslendirdiler ve cinaiy iş açılacağı aqqında haber ettiler. Fondnıñ reisi Qırım.Aqiqatqa añlatqanı kibi, bu mülk boyunca SBU daa Qırım işğalinden evel sorğularnı keçire edi, amma o vaqıt bütün meseleler çezilgen edi.
Şevkiyevniñ aytqanına köre, Cengiz Dağcı beş yıl evelsi İngliterede elâk oldı, şeyleri ise Fondda saqlansın ve ileride qırımtatarlarnıñ facialı taqdiri aqqında romanlarnıñ müellifine müzey açılsın dep, Qırımğa türk arqadaşları tarafından ketirildi.
