Al-azırda Federal havfsızlıq hızmetiniñ hadimleri Aqmescit rayonınıñ Colman (Pionersoke) köy hastahanesinde türk dünyasında belli olğan qırımtatar yazıcısı Cengiz Dağcınıñ şahsiy şeyleri olğanı sebebinden tintüvni keçireler.
Qırım.Aqiqatqa «Qırım» Fondu» hayriye teşkilâtınıñ başı Riza Şevkiyev aytqanı kibi, çarşenbe künü, dekabr 17-de, onı yazıcınıñ şahsiy şeylerniñ işi boyunca Aqmescitte yerleşken FSB idaresine çağırdılar.
«İdarege kelgende, maña FSB hadimleri hastahanede olğan yükni teşkerecek olğanını bildirdiler. Aqmescitten obyektke yol aldıq. Anda FSB 9 hadimi endi buluna edi. Olar maddelerge esaslanıp, yükniñ elastı aqqında qararnı seslendirdiler. Maña qarşı cinaiy iş açılacağı aqqında haber ettiler»,– dedi Şevkiyev.
Onıñ aytqanı kibi, uquq qorçalayıcı organlarnıñ hadimleri şeyler evelleri «Türkiye konsullığından resmiy şekilde Ukrainağa berilgenine» baqmadan, olarnı teşkerecek olalar.
«Qapular müürli, anahtarnı tapıp olamaymız, endi nasıl areket etecegimizni de bilmeymiz»,– dedi Fondnıñ reisi.
O şunı da qayd etti ki, FSB hadimleri «özlerini normal şekilde alıp bara, amma olayatqan adiselerni videoğa çekmege izin bermeyler, qararda ise yasaq olğan bir şey yoqtır».
Şevkiyevniñ aytqanına köre, Cengiz Dağcı beş yıl evelsi İngliterede elâk oldı, şeyleri ise Fondda saqlansın ve ileride qırımtatarlarnıñ facialı taqdiri aqqında romanlarnıñ müellifine müzey açılsın dep, Qırımğa türk arqadaşları tarafından ketirildi.
Qırım.Aqiqat bergen malümatqa köre, salı künü, dekabr 16-da, «Qırım» Fondu»nıñ yolbaşçısınıñ apellâtsiyası boyunca ilk mahkeme toplaşuvı keçirildi.
