Qırımda mahkeme «Qırım» Fondu» hayriye teşkilâtınıñ ve onıñ başı Riza Şevkiyevniñ para cezanıñ belgilenüvi boyunca apellâtsion şikâyetniñ baqılması başlandı. Toplaşuv devamında, dekabr 16-da, Şevkiyev bir sıra muracaatlarnı seslendirdi, olarnıñ arasında – işniñ qırımtatar tilinde baqılması.
Qırım.Aqiqat mühbiri aytqanı kibi, mahkemede reislik yapkan Vladimir Bondarev muracaatlarnı baqqanda, Şevkiyev rusça yahşı bilgenini qayd etti, o ise: «Ketişatnıñ, Qırım Anayasasına köre, tuvğan tilimde keçirilmesini talap etmege – menim aqqımdır. Bazı şeylerni qırımtatarca men daa da güzelce añlayım».
Neticede mahkemeci hayriye teşkilât başınıñ bütün talaplarını diqqatqa aldı.
Şevkiyev nevbetteki toplaşuv qırımtatar tilinde ötkerilecegine ümüt besley, çünki, aytqanı kibi, mahkemeci tercimannı celp etmege söz berdi.
Hayriye teşkilâtnıñ başı tarafından etilgen memuriy bozuluv boyunca nevbetteki mahkeme toplaşuvı dekabr 23-de keçirilecek. Dekabr 18-de, cumaaqşamı künü, Apellâtsion mahkemede «Qırım» Fondu»nıñ şikâyeti baqılacaq.
Qırımnıñ medeniy miras qoruv «Devlet komiteti» tizgen memuriy protokolğa binaen, «Qırım» Fondu» hayriye teşkilâtınıñ reisi Riza Şevkiyev KoAP RF 7.13 1 maddesine köre (Rusiye Federatsiyası halqlarınıñ medeniy miras obyektleriniñ devlet imayesi ve qullanuv talaplarını bozuv) memuriy cinayet yaptı.
Bu maddege köre, teşkilât reisi 400 biñ rublelik para cezasını ala bile, «Qırım» Fondu» ise – 5 million rublelik.
Bundan ğayrı, sentâbr ayında, Aqmescit Merkeziy rayon mahkemesi «Qırım» Fondunı yedi adres boyunca yerleşken mal-mülkini, şu cümleden Şmidta soqağındaki Meclis binasını qullanmağa yasaq etti, bank esaplarını qapattı ve yañı esaplarnı açmağa yasaq etti.
