Rusiye çetel işler naziri «Ukraina Cenübiy-Şarqında facianıñ» talilini yañlış dep adladı ve işğal etilgen Qırımda insan aqları aqqında Ukrainada insan aqları boyunca BMT Missiyasınıñ sekinci maruzasında olğan tenqidini tanımadı, haber ete Radіo Svoboda.
Şu cümleden, BMT maruzasındaki Rusiye tarafından işğal etilgen Qırımda insan aqlarınıñ vaziyeti aqqında tenqidi sebebinden Moskvada Qırım Rusiye subyekti olğanını ve andaki vaziyet Ukrainada BMT Missiyasınıñ mandatına ait olmağanını qayd ettiler.
Aynı zamanda Ukraina çetel işler nazirligi işbu maruzanıñ bazı eksiklikleri olğanına baqmadan, onı olduqça obyektiv olaraq tanıy. Kiyevde bildirilgeni kibi, bu maruzada Ukrainada insan aqlarınıñ vaziyeti beterleşüv sebeplerine – Rusiye tarafından Qırımnıñ işğali ve Ukraina şarqiy regionlarında vaziyetniñ kerginleşüvine – diqqat yeterli seviyede ayırmağan eken.
Nazirlikte «ukrain arbiyleri tarafından insan ve gumanitar aqlarınıñ bozuluvları aqqında «bazı» qaynaqlardan alınğan sahte malümatnıñ aşkâr etilmesini» de qayd ettiler. «Bunıñ ile Ukrainanıñ mustaqilligi ve topraq bütünligiñ qoruvına olğan qanuniy aqqı diqqatqa alınmay», – deyler nazirlikte
Mında BMT diger maruzalarında Ukraina şarqında ve Qırım Muhtar Cumhuriyetinde vaziyetniñ ilerilemesine tesir etken yalıñız içki şaraitlerni degil de, tış faktorlarnıñ qayd etilecegine ümüt besleyler.
Qırım işğali yarımadada insan aqları boyunca halqara missiyalarnıñ olmasını imkânsız etti, deyler uquq qorçalayıcılar.
