Ukrainada qırımtatar halqınıñ statusı aqqında qanunnı qabul etmek kerek. Ukraina devleti bu statusnı kefil etkeni aqqında aytqan edi, amma ne Adliye nazirligi, ne uquq qorçalaycılar, ne diger organlar tarafından teşebbüs daa yoqtır.
Bu aqta Qırım.Aqiqatqa Ukraina prezidentiniñ qırımtatarlarnıñ işleri boyunca Vekâletli Mustafa Cemilevniñ faaliyetiniñ tenminlevi boyunca bölüginiñ yolbaşçısı Arsen Jumadilov bildirdi.
«Ukraina Yuqarı Şurasınıñ Qararında qırımtatar halqı Ukrainanıñ tamır halqı olğanı aqqında aytıla. Güzel, amma qırımtatar halqınıñ statusı aqqında qanun olmalı. Onı daa kimse işlep çıqarmadı», – dedi o.
Jumadilov şunı da bildirdi ki, Qırımtatar Milliy Meclisi ve Qurultayı alâ daa Ukraina uquqiy alanına kirsetilmegen eken.
«Qırımtatar meselesi siyasiy şartlarnıñ mabüsi olmaqta. Biz bunı istemeymiz. Biz qanunlarda milliy idare organlarınıñ aq ve mecburiyetleriniñ qayd etilmesini isteymiz. Böyleliknen qırımtatarlarnıñ Ukraina devletinde subyektivligi olacaqtır»,– dedi o.
İşbu sualler dekabr 22 künü Kiyev-Mogilân akademiyasında olacaq «Qırımtatarlarnıñ, Ukraina tamır halqı olaraq, aqları teminlevinde ukrain yolu» konferentsiyasında muzakere etilecek.
Tafsilâtlıca Qırım.Aqiqat saytınıñ Arsen Juumadilov ile maqalesinde oquy bilesiñiz.
Mart ayında Ukraina Yuqarı Şurası Ukraina devleti terkibinde qırımtatar halqınıñ aqları kefaleti aqqında qararnı çıqarğan edi. Oña köre, Ukraina qırımtatar halqınıñ, tamır halq olaraq ve Ukrainanıñ diger milliy azlıqlarınıñ qavmiy, medeniy, til ve diniy hususiyetleriniñ saqlanılmasını kefalet etmekte.
