Link açıqlığı

Aqmescit – Qırım medeniyet, sanat ve turizm universitetiniñ (KUKiT) rektorı Oleg Gabriyelân öz itsegi ile istifağa çıqtı. Alğan qararınıñ sebepleri aqqında aytqanda, «teneffüs etmek kerek» olğanını qayd etti. Aynı zamanda, Qırım medeniyet Nazirliginde olğan qaynaqnıñ malümatına köre, müessiseniñ yolbaşçılığı universitet rektorınıñ faaliyetinden memnün degil edi eken.

Qırım medeniyet, sanat ve turizm universitetiniñ rektorı, felsefe ilimler doktorı, professor Oleg Gabriyelân öz vazifelerinden vazgeçti. O, mında 2010 senesi sentâbr ayından çalışa edi. Qırım.Aqiqatqa Gabriyelânnıñ özü aytqanı kibi, arizanı kendi istegi ile yazğan eken.

«Vaqıt keldi. Ögde yapılacaq iş çoq, başqa ğayeler kerek, ümüt etem ki, zaman talaplarına uyğan bir insanlar kelir. Maña, ğaliba, teneffüs etmek kerek», – dep añlata qararını Gabriyelân.

Adımı aliy oquv yurtunıñ yoq etilmesi ve onıñ yerinde başqa universitetniñ peyda olacağı ile bağlımı degen sualge sabıq rektor cevap bermedi. Bunıñ ile Gabriyelân Qırım «medeniyet naziri» Arina Novoselskayanıñ universitetniñ kelecek taqdiri aqqında aytqan sözlerine esaslandı: «Nazirnen universitetniñ ğayrıdan qayd etüvi olacağı ile añlaşqan edik. Qapatılması aqqında söz yürsetilmedi», – dep qayd etti KUKiTniñ sabıq rektorı.

Rektor vazifesinde kimni körmege ya da kimni tevsiye etmege istegeni aqqında Gabriyelân bir şey aytmadı: «Şimdi qıyın bir vaziyet, yañı şartlar, bu işke kim azırdır, aytıp olamam».

Öz planları aqqında sabıq rektor: «iş qıdıracağım» dep ayttı. «Qırım ile bağlı çoq icadiy niyetim bar. Zenaatdaşım ile çeşit proyektlerni azırlayım, ümüt etem ki, olarnı amelge keçirmek içün vasta taparım»,– dep tarif ete professor. Böyle leyhalardan biri, aytqanı kibi, «Rus dünyası. Qırım» kitabınıñ neşir etilmesidir.

Hatırlatamız, Qırım «Nazirler şurası» Qırım medeniyet, sanat turizm universitetiniñ yoq etilüvi aqqında qarar aldı. Ocalarnıñ aytqanı kibi, böyleliknen universitetiniñ akkreditatsiya ve litsenziyası da yoq olur. Qırım.Aqiqat universitetniñ studentleri arasında keçirgen soravına köre, olardan çoqusı menfaatlarını qorçalamaq içün narazılıq numayışlarına çıqmağa azır eken.

«Munasip rektor edi»

Keçken afta KUKiT ocası, professor, tarih ilimler doktorı Yuriy Mogariçev Qırım.Aqiqatqa universitet etrafında olğan vaziyetni izaatlap, aliy oquv yurtunıñ likvidatsiyası ile onıñ yolbaşçılığınıñ deñiştirilmesi mümkün olğanını qayd etken edi. «Universitetniñ bugünki rektorı bir kimseniñ planlarına kelişmey, ğaliba», – dedi o vaqıt Mogariçev.

Qırım.Aqiqat kene Mogariçev ile bağlanıp, Gabriyelânnıñ işten boşatıluvı aqqında fikrini ögrendi. Oca bu aqta matbuat vastalarından ögrengenini bildirdi. Bu er şey kimniñ menfaatındadır degen sualge cevap berip olamadı: «Gabriyelân munasip rektor edi»,– dedi Mogariçev. Qırım medeniyet, sanat ve turizm universitetiniñ yañı rektorı kim ola bilecegi aqqında tüşüncelirini de bildirmedi. «Ukraina qanunlarına köre cidiy vaziyet edi: universitetniñ retkorı ilimler namzeti, professor ola bile edi, Rusiye qanunları ile başqa», – dedi Mogariçev.

Qırım «medeniyet nazirliginde» Qırım.Aqiqatqa müessisege OlegGabriyelânnıñ arizası kelgenini bildirdiler. «Şimdi onıñ yerine kimni tayin etmek kibi mesele baqıla», – dep añlattılar matbuat hızmetinde. Muayyen bir namzetlerniñ adlarını aytmadılar.

Aynı zamanda, Qırım.Aqiqatnıñ «medeniyet nazirliginde» olğan qaynaqları bergen malümatqa köre, «müessiseniñ yolbaşçılığı Gabriyelânnıñ faaliyeti aqqında çoqtan memnüniyetsizligini bildire edi», şunıñ içün bu kibi qarar «mantıqiy»dir. Amma, subetdeşimiz aytqanı kibi, universitetniñ taqdiri soñuna qadar daa belgilenmegen.

XS
SM
MD
LG