Link açıqlığı

Saatnıñ esas haberi

Aqmescitliler telâştan tehnikanı satın almağa başladılar


İşğal etilgen Aqmescitniñ elektron tehnika tükânlarında soñki künleri müşterilerniñ sayısı ep arta. Qırımlılar rubleniñ tüşmesi sebebinden beştahtalardan er şeyni satın alalar.

Qırım.Aqiqat neşiriniñ mühbirine Aqmescitte Mayakovsogo soqağı boyunca yerleşen «Fokstrot» tükânında añlatqanları kibi, salı künü, dekabr 16-da, müşterilerniñ sayısı, iç bir zaman olmağanı kibi, büyüktir.

«Adet üzre Yañı yıl arfesinde daima insanlarnıñ sayısı çoq ola, amma şimdi bu al rubleniñ tüşüvi ile bağlı. Müşteriler evel satın almağa istegen şeylerni şimdi alalar», – dedi tükân hızmetçisi.

Satıcılarnıñ aytqanı kibi, müşteriler televizor, kombayn, buzdolap, çaynik ve diger tehnikanı satın ala. Bazıda müşterilerni qabul etmek içün hadim bile yetişmey.

«Belki de, yarın fiyatlar deñişir, kurs er bir daqiqa deñişe, şunıñ içün şimdi almaq lâzim»,– dedi satıcı.

Qayd etmek kerek ki, salı künü aqşamı, dekabr 16-da, Aqmescitniñ para deñiştirüv noqtalarında dollarnıñ satuvı 95 ruble olıd, yevro – 100 ruble.

Evel bildirilgeni kibi, Rusiye rubleniñ tüşmesi ile işğal etilgen Qırımda para eyecanı başlandı. Qırım.Aqiqat bergen malümatına köre, çetel paranıñ kursı er 5-10 daqiqa deñişe. İnsanlar telâşta deñiştirüv noqtalarında olğan para birlemlerini satın almağa atılğanlar.

İşğal etilgen Qırımda bazı şahsiy tükânlarda beşçtahtalardan Rusiye rublesi ile olğan mahsulat levhaçıqlarnı alıp taşlaylar. Bu aqta içtimaiy ağlarda keriçliler yaza.

XS
SM
MD
LG