Qırım «prokurorı» Natalya Poklonskaya öz ğayreti sebebinden mıtlaqa general unvanını qazanır, dep bildirdi Komsomolskaya pravda gazetasına Qırımnıñ öz başına tayin etilgen baş naziri Sergey Aksönov.
«O, adliye ilimlerniñ namzeti olmaq istey, hızmetinde de muvafaqiyetlerge irişmege niyeti bar. General olmalıdır, dep tüşünem – mında başqa variantlar yoq. Natalya – Qırımnıñ yüzü, oña qol tutmağa tırışacaqmız», – dedi Aksönov.
O, Poklonskayanıñ cesürligini ve onıñ erkek-prokurorlardan daa quvetli olğanını qayd etti.
«Natalya Vladimirovna bu keçici müddet devamında özüni ğayet cesür alıp bardı. Üç kün içinde 6 prokurornı deñiştirdiler… Prokuraturada çalışqan ve Rusiye tarafdarları olğan erkeklerni davet ete edik, amma kimse becermedi: birini apayı yollamadı, ekincisi hastalandı, üçüncisinde bürtük çıqtı»,– dey Aksönov.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
