Bu sene Rusiye tarafından işğal etilgen Qırımda 3,6 mln turist raatlandı eken. Bu aqta Devlet dumasında Rusiye medeniyet naziri Vladimir Medinskiy bildirdi, – dep haber ete dekabr 16 künü TASS agentligi.
«Dekabr 1 kününe olğan malümatqa köre, Qırımda 3,6 mln turist raatlandı»,– dedi nazir ve turistlerden 3 mln – rusiyeliler olğanını qayd etti, Ukrainadan kelgen turistlerniñ sayısı «bayağı eksildi» eken.
Medinskiyniñ fikrine köre, yılnıñ soñuna yarımadanı ziyaret etecek turistlerniñ sayısı 3,8 mln insan olacaq eken.
Medeniyet aqqında aytqanda, nazir Qırımnıñ medeniy saasınıñ inkişafı içün 7 mlrd ruble miqdarında qoşma yatırımlar qıdırılacağını bildirdi.
Evel bildirilgeni kibi, dekabr 9 künü Qırımnıñ «Nazirler Şurası» 2017 senesine qadar kurort ve turizm inkişafı programmasını tasdiqladı. Programmanıñ maliyeviy tarafı 9,4 mlrd rubleni teşkil etmeli.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
