«Qırım» Fondu» Hayriye teşkilâtınıñ baş müdiri Riza Şevkiyevni Federal havfsızlıq hızmetine sorğuğa çekeler. O, çarşenbe künü, dekabr 17-de, FSB bölügine kelmek kerek.
Bunı Şevkiyev Qırım.Aqiqatqa bildirdi.
«Olar meni bugün FSBge çağıracaq ediler, lâkin bugün menim mahkemem bar, sorğu yarın saat 9:30 keçirilecek. Olarnıñ aytqanına köre, sorğu sebebi bizler beş yıl evelsi alğan türk aleminde meşur olğan qırımtatar yazıcısı Cınğız Dağcınıñ şahsiy eşyaları ola», – dedi Şevkiyev.
Onıñ bildirgenine köre, yazıcı İngilterede vefat etti, Türkiye arqadaşları ise ileride qırımtatar halqınıñ facialı taqdiri aqqında bir çoq roman müellifine müzey açtırmaq içün onıñ şahsiy eşyalarını Fondğa berdi.
Malüm olğanı kibi, dekabr 16-da Qırımda Qırımnıñ Apellâtsion mahkemesinde «Qırım» Fondu» Hayriye teşkilâtınıñ memuriy işi ve oña ve reberligine para cezalarınıñ belgilenmesi boyunca toplaşuv ötkerilecek.
Cınğız Dağcı 1920 senesi mart 9-da Yalta civarındaki Qızıltaş köyünde dünyağa keldi. Qırımda yalıñız 20 yıl yaşadı. O, qırımtatarlarnıñ yaşayışı aqqında bir sıra roman yazdı. Onıñ eserleri dünyada eñ emiyetli, eñ oquvlı olaraq tanılğan edi.
