Ukraina halq deputatı olğan qırımlı Lüdmila Denisova «Krım» fraktsiyalarara birleşmesine kirmedi, çünki bunıñ faydasını körmey.
Bu aqqında o Qırım.Aqiqat içün bergen izaatlarda qayd etti.
«Anda Qırımnı qaytarmaq içün belli bir ğaye olsa, men bunıñ kibi fraktsiyadan tış birleşmesine kirerim. Amma bu kene de sahte vatanperverlikni köstermek içün yapılsa, bilesiñizmi, bu parlamentte yapacaq başqa işim bar», – dedi o.
Qırımnı qaytarmaq içün deputatlar angi ğayelerni yerine ketirmeli sualine Denisova dedi ki, Milliy havfsızlıq ve mudafaa şurasınıñ vekâletlerini kenişletilmeli.
«Şimdi RNBO şekillendirile. Mence, kelecek afta bizler RNBO kâtibiniñ vekâletini kenişletecek qanunnı qabul eterik ve belli bir adam onıñ reisi vazifesine tayinlenecek. Parlament ise, menim fikirimce, Qırımnıñ Ukrainağa qaytarılması içün er bir qararğa qoltutar», – dedi Denisova.
Dekabr başında Ukraina Yuqarı Radasında «Krım» fraktsiyalarara deputatlar birleşmesi meydanğa ketirildi. Onıñ vekilleri bildire ki, onıñ esas vazifesi yarımadanıñ işğal mevzusını Ukraina siyasetiniñ kün tertibine qaytarmaqtır.
«Krım» fraktsiyalarara birleşmesiniñ erkânına on bir deputat kirdi. Olardan ekisi Qırım siyasetçileri ola: Ukraina prezidentiniñ qırımtatar halqı işlerinden vekâletlisi Mustafa Cemilev ve Belbek arbiy bölüginiñ sabıq komandanı Yuliy Mamçur. 2001 senesine qadar Kezlevde yaşağan deputat gruppasınıñ azası İrina Friz de qırımlı olaraq sayıla.
