Link açıqlığı

Kiyevde dekabr 17-de «Qırımtatarlarnıñ tarih ve medeniyet yadikârlıqları» tögerek masası ötkerilecek. Tedbir Eski Qırımdaki Özbek Han camisiniñ 700 yıllığına bağışlana.

Bunı tedbir teşkilâtçıları «Kiyevdeki qırımtatarlar cemiyeti» Qırım.Aqiqat saytına bildirdi.

Tögerek masa Ukraina halq deputatı, Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ qoltutuvı ile keçirilecek. O, musafirlerni selâmlaycaq.

«Tögerek masa keçirilmesiniñ maqsadı Ukrainada islâm ve qırımtatar tarih ve medeniyet yazma ve mimarcılıq yadikârlıqlarınıñ saqlaması ve imayesi, Qırımda islâm dininiñ peyda olması ve Özbek Han camisiniñ qurucılığını tedqiq etmek kerekligi meselesine diqqatlarnı celp etmekten ibarettir», – dep qayd eteler teşkilâtçılar.

Tedbirge diplomatlar ve Ukrainadaki halqara teşkilâtlarnıñ vekilleri, devlet akimiyet organları, diniy teşkilâtlar ve alimler davet etildi.

Tedbir Kiyev saatine köre saat 11:00 Sofiyevskaya 2-A adresi boyunca GUAM Demokratiya ve iqtisadiyat inkişafı Kâtibiyetinde başlanacaq.

XS
SM
MD
LG