Link açıqlığı

Bazarertesi künü işine başlağan Ukraina – Avropa birligi Şurası vizasız rejim olması içün areket etmege azır olğanını bildirdi. Lâkin bundan evel şahıslarnıñ areketleri teşkil etilmeli ve nezaret etilmeli, dep qayd etile Avropa birligi şurasınıñ saytında derc etilgen şuranıñ birinci inauguratsion toplaşuvınıñ neticeleri boyunca matbuat vesiqasında, dep haber ete Azatlıq Radiosı.

Vesiqada qayd etile ki, taraflar Ukrainanıñ vizasız rejim yolunda atqan ilk adımlarına müsbet qıymet kesip, bunıñ ekinci basamaq areketlerini ögrenmege başlay.

Bundan ğayrı, vesiqanıñ bir çoq maddesinde Avropa Birligi ve Ukrainanıñ Rusiyeniñ Qırım işğalini takbih etmesi qayd etile. Olar işğal, Ukrainada bulunğan qanunsız askerler, silâ ve cenk tehnikası iç bir vaqıt tanılmaycağını bildireler.

Avropa birliginiñ çetel işleri ve havfsızlıq siyasetiniñ yuqarı vekili Federica Mogherini toplaşuvdan soñ ötkerilgen matbuat konferentsiyasında cumaaqşamı kününe planlaştırılğan Avropa birligi toplaşuvından evel Avropa birliginiñ Qırımğa qarşı yañı ceza belgilenmesine ümüt beslegenini bildirdi.

Avropa birliginiñ Şurası tışqı işler nazirleri seviyesinde Rusiyeniñ Qırım ve Aqyar işğali sebebinden qoşma sıñır tedbirleri teklifine razı oldı. Al-azırda tehnikiy muzakereler keçirile eken.

XS
SM
MD
LG