Ukraina – Avropa birligi Assotsiatsiya Şurasınıñ Brüsseldeki inauguratsion toplaşuvında bazarertesi künü, dekabr 15-te, Ukraina eyyeti Rusiye akimiyetiniñ Qırımda insan aqlarını bozuv ve qırımtatarlarğa basqı meselesine diqqat ayırdı.
Bunı Ukraina baş naziri toplaşuv neticeleri boyunca matbuat konferentsiyasında bildirdi, dep haber ete «Narodnıy front» firqasınıñ matbuat hızmeti.
«Bizler qırımtatar meselesini qayd ettik, çünki Rusiye akimiyetiniñ Qırımda insan aqlarını bozğanını ve qırımtatarlarğa basqı yapqanını tasdıqlağan delillerimiz bar», – dedi Ukraina ükümetiniñ reisi.
Bundan ğayrı, Ukraina eyyeti Ukraina – AB Assotsiatsiya toplaşuvında Avropa birligi aza memleketlerinden Qırım boyunca yatırım sıñırlanması meselesine diqqat ayırdı.
«Bizler Rusiyeni Qırımnıñ qanunsız işğali sebebinden mesülietke çekmek içün uquqiy yardım istedik», – dep qayd etti Yatsenük.
Avropa birliginiñ Şurası tışqı işler nazirleri erkânında Rusiyeniñ Qırım ve Aqyar işğali sebebinden qoşma sıñır tedbirleri teklifine razı oldı. Al-azırda tehnikiy muzakereler keçirile eken.
