İşğal etilgen Qırımda mahkemege 30 yaşındaki Aqmescit sakinine qarşı cinaiy iş yollanıldı. Onı tanışnıñ öldürüvinde qabaatlaylar. Bu aqqında dekabr 15-te Qırımnıñ «Taqiqat komiteti» bildirdi.
Taqiqatnıñ malümatına köre, 2014 senesi sentâbr ayında qabaatlanğan şahıs Aqmescit rayonınıñ eki köyü arasındaki yolda tanışınen qavğa etip, onıñ başını çöküçnen urdı.
«Ölgenini tüşünip, er kişi maşinadan benzin kanistrasını çıqardı ve zarar körgen insan etrafındaki yerge benzin tökip, onı yaqtı ve ketti. Sentâbr 11-de saba daa sağ olğan er kişini yerli sakinler tapıp, hastahanege alıp kettiler, anda o körgen yaralardan can berdi», – dep haber ete komitetniñ matbuat hızmeti.
Qırımnıñ öz başına ilân etilgen ükümet «ruporı» Krıminform saytı bildire ki, qabaatlanğan şahıs bundan evel öldürüv sebebinden mahkeme etilip, Donetsk vilâyetinde apiste bulunğan edi. Anda da zarar körgen adamnen tanış olğan eken. Zarar körgen adam bu sene yazda terrorizmge qarşı tedbirler keçirilgen yerden köçip keldi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
