Ukrain uçucısı Nadejda Savçenko açlıqnı ilân etti. Bu aqqında onıñ adliyecilerinden biri Mark Feygin Twitterde bildirdi.
Dekabr 12-de adliyeci bildirdi ki, Savçenko onıñ aqları cenk esiri olaraq körmemezlikke urulsa, açlıqnı ilân etmege tüşüne.
Savçenko kendi cenk esiri statusına baqmadan Halqara Qızıl Haç Komitetine muracaat etip, işten boşatuv aqqında rica etti.
Savçenkonıñ adliyecisi Nikolay Polozov dedi ki, Halqara Qızıl Haç Komiteti Savçenkoğa cenk esiri statusını bermesi mümkün. Bundan soñ, adliyeciniñ aytqanına köre, Jeneva konventsiyasına köre Rusiye cinaiy taqipni toqtatmağa mecbur qalacaq.
Rusiyede Nadejda Savçenkonı Rusiye jurnalistleriniñ ölümine alâqası bar olğanında qabaatlaylar. Bundan ğayrı, oktâbr soñunda berilgen malümatqa köre, Savçenkoğa qarşı daa bir cinaiy iş açacaq olalar – «sıñırdan qanunsız alda keçüv» sebebinden. Savçenko bu qaatlarnı red ete. Onıñ imayesi ise Nadejda Savçenkonı esir alıp, Ukrainadan zorlap çıqarğanlarını bildire.
Oktâbr ayında Moskva mahkemesi Nadejda Savçenkonıñ apis müddetini 2015 senesi fevral 15-ne qadar arttırdı.
Savçenko «Batkivşçına» cedveli boyunca Ukraina Yuqarı Radasına saylandı. Dekabr 11-de Yuqarı Rada Devlet duması ve Rusiye prezidenti Vladimir Putinge Savçenkonıñ azat etilmesi muracaatı aqqında qararnı imzaladı.
