Soñki yarım yıl devamında yarımadanıñ zapt etilgen topraqlarında qurulğan inşaatlarnı yıqacaqlar, dedi Qırım baş naziri Sergey Aksönov.
Bunı Qırım «ükümetiniñ» matbuat hızmeti bildire.
Aksönovnıñ aytqanına köre, «samozahvatlarda» işletüvge kirsetilgen ve beş yıl devamında kommunal hızmetleri ödenilgen inşaatlar qanuniy sayıla.
«Bazıları akimiyetniñ qırımlılarğa millet mensüpligine baqmadan topraq bermek istegini yañlış añladılar. Birisi akimiyetni şantaj etmege istedi, ultimatum qoyacaq oldı. Böyle bir şey olmaycağını aytmaq isteyim ve qanunsız alda zapt etilgen topraqlarda inşaat qurğan vatandaşlarnı uslanmağa çağıram. Bütün inşaatlarnı yıqacaqlar. Paranı boşuna masraf etmeñiz – qarar alındı», – dedi Qırım «yolbaşçısı».
Onıñ bildirgenine köre, daa 3-4 ay evelsi «samozahvatlarnı» cedvelge aldılar, fotolarını çıqardılar.
O, Qırım «baş naziriniñ muavini» Ruslan Balbekke Qırım «prokuraturası», MVD ve FSBnı celp etip, «zapt etilgen topraqlarda inşaat qurğan vatandaşlarnı» tenbiyelemege avale etti.
«Narazılıq meydanlarınıñ» iştirakçileri Qırım akimiyeti topraq meselesinde vatandaşlarnıñ menfaatlarını köz ögüne almağanını bildirgen ediler. Bunı Aqmescit civarındaki Avtogaz ve Strelkovoye massivleriniñ sakinleri ayttılar. Olar Rusiye prezidenti Vladimir Putinge şikâyet ettiler.
