Link açıqlığı

Saq rayonınıñ Yañı Qarağurt köyünde mart ayında, Rusiye Qırımnı öz terkibine qoşqanından soñra, cami qurucılığını toqtatmağa mecbur oldılar.

Qırım musulmanları diniy idaresiniñ matbuat hızmeti aytqanı kibi, caminiñ qurucılığı «Ramadan» musulman diniy cemiyetiniñ teşebbüsi ile başlandı. 2014 senesi mart ayında musulmanlar öz ğayreti ile caminiñ temelini qoydılar, paranı köy sakinleri topladılar.

«Musulmanlarğa maliyeviy yardımcılar qol tutacaq ediler, amma Qırımda baar aylarında qanunlarnıñ deñişmesi ile olar sözüni tutıp olamadılar, şunıñ içün Allah eviniñ qurucılığıını toqtatmağa mecbur oldılar»,– deyler QMDİde.

Camiden ğayrı, musulman cemiyeti köyde Diniy-medeniy merkezini qurmağa istey edi. Mında bayramlar qayd etilmek, el nağışları, dülger işleri boyunca tögerekler, til dersleri, Quran ve İslâm negizleri boyunca kurslar keçirilmek kerek edi, bunıñ ile kitaphane, sport zal ve medrese açılacaq edi.

Musulman cemiyeti maliyeviy yardımcılarğa ümüt besley.

2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG