Link açıqlığı

Aqmescit çarşlıranda 160 insannı yaqalağan uquq qorçalayıcılarnıñ areketleri Rusiye qanunlarına uymay.

Bu aqta İnsan aqları boyunca Qırım alan missiyası bildire.

Yaqalanğanlardan elde etilgen malümatqa köre, insanlarnı bir qaç saat devamında Ekstremizmge qarşılıq Merkezinde tuta, analizlerni ala ve iç bir vesiqasız sorğuğa çeke ediler.

«Politsiyada yaqalav aqqında protokolnı tizmek kerek ediler. İnsanlarnı yaqalay bileler, amma olarğa statuslarını bildirmeyip, sorğuğa çekmege mümkün degil»,– dedi eyyetniñ idarecisi Aleksandra Krılenkova.

Uquq qoruyıcı añlatqanı kibi, Rusiye qanunlarına köre, memuriy bozuluv etilmesinde qabaatlanğan insanğa o nasıl kitaplarnı oquy ve qaysı bir teşkilâtlarnıñ azası ola kibi suallerni bermege olmay.

Sorğular muayyen qaideler boyunca keçe: bildirüv kele, statusıñız belgilene ve nasıl işniñ çerçivesinde sorğu keçirilecegi qayd etile.

O, qanunlarğa ters sürette keçirilgen areketlerden vazgeçmege tevsiye ete.

«Daktiloskopiyanı bermege sizni kimse mecbur etip olamaz, hususan DNK analizi. Memuriy bozuluvlarda bu ketişat göñülli sürette yapıla. Şunıñ içün razı olmañız», – dey Krılenkova.

Evel bildirilgeni kibi, noyabr 15 künü Aqmescitte «Lokomotiv» çarşısında «slavân körünişi» olmağan 60 insannı yaqaladılar. Noyabr 20 künü Aqmescitniñ Merkeziy Çarşısında daa 100 insannı. Protokollarnı kimse tizmedi.

XS
SM
MD
LG