Saba, dekabr 15 künü, Keriç keçitinde 4 parom qatnay. Yolcu ve yük yolaqlarında nevbette biñden ziyade maşina tura.
Bu aqta Yekâne naqliyat müdirliginiñ matbut hızmeti bildire.
«Şimdilik Keriç boğazında yel suratı 5 m/s yete. «İonas», «Olimpiada», «Glükofilousa» ve «Nikolay Aksenenko» paromları qatnay, – denile beyanatta.
Müdirlikniñ malümatına köre, saba «Kavkaz» limanında nevbette 270 yengil ve 92 yük, «Qırım» limanında – 5 yengil ve 90 yük maşinası tura. Yük yolağında nevbetni: «Novorossiysk» limanında – 135 maşina, Slavânsk-na-Kubani – 430 avto, Keriç limanında – 293 yük maşinası bekley.
Keçken kün devamında 1845 maşina ve 5205 yolcu avuştırıldı.
Bazar künü, dekabr 14-de, saat 21:00 Keriç keçitiniñ işi, ava şaraitlerinden sebep, dekabr 15 künü saat 9-ğa qadar toqtatılğan edi.
