Link açıqlığı

Türkiyede Recep Tayip Erdoğannıñ ükümet faaliyetine muhalif sayılğan Zaman gazetasınıñ baş muarriri Akram Dumanli yaqalandı.

Bunı AFP bildire.

Terrorizm ile küreş boyunca mahsus bölükiniñ politsiya hadimleri dekabr 14 künü İstanbulda yerleşken Zaman muarririyetine keldi. Amma binanıñ yanında narazılıq numayışına toplanğan oquyıcılardan sebep, politsiya ketmek zorunda qaldı. İnsanlar: «Matbuat vastalarını susturmaq mümkün degil!» şiarını seslendire edi.

Gazeta hadimleri ve oquyıcıları olacaq aktsiya aqqında Twitterde olğan anonim bildirüvden bildiler. Mında istenmez jurnalistlerge qarşı akimiyetniñ areketleri aqqında aytıla edi.

Dekabr 14 künü Türkiyede memleket boyunca AQŞda yaşağan islâm cemiyet erbabı, Erdoğannıñ raqibi – Feythullah Gülenge qol tutqan 23 insan yaqalandı.

Olarnıñ arasında politsiya hadimleri, jurnalistler ve prodüsserler bar.

Uquq qoruyıcılarnıñ aytqanı kibi, Erdoğan mustaqil matbuat vastalarına qarşı cenkni ilân etti. Em de devlet başınıñ esas raqibi Zaman gazetası oldı. Erdoğannıñ fikrine köre, işbu gazeta Gülen ile bağlı.

Türkiye akimiyeti Gülen tarafdarlarına qarşı qabaatnı endi ilân etken edi. Olarnı devlet avdarmasını teşkil etmek ıntıluvlarda qabaatladılar.

Erdoğan yıl evelsi peyda olğan qaparcılıq davasıdan mesülietni de Gülenge yükley.

Matbuat vastalarınıñ malümatına köre, yaqın zamanları uquq qoruyıcı organlar daa 150 jurnalistni yaqalaycaq ola.

XS
SM
MD
LG