«Qırım» batalyonı Ukraina akimiyetinden memleketniñ vaqtınca işğal etilgen topraqlarında yaşağan qavmiy ukrain, qırımtatarlarnıñ ve Ukraina diger vatandşalarnıñ milliy-medeniy, içtimaiy ve siyasiy aqlarınıñ amelge keçirilüvini talap ete.
Bu aqta malümat batalyonnıñ Facebook saifesinde aşkâr etildi.
«Ukraina devlet siyasetiniñ vaqtınca işğal etilgen topraqlarda yapılacaq vazifeleri: ukrain, qırımtatarlarnıñ ve Ukraina diger vatandaşlarınıñ anayasa aqlarını temin etmek, Ukraina devletiniñ mülki ve infrastrukturasını saqlamaq, Ukraina vaqtınca işğal etilgen territoriyalarını acele azat etmek ve anayasa quruluşını pekitmek», – deyler batalyonda.
Ukraina devlet siyasetini vaqtınca işğal etilgen Qırımda amelge keçirmek içün Ukraina Nazirler Kabineti tertibatında, nazirleklerde vaqtınca işğal etilgen territoriyalar boyunca Vekâletli insanlar olmaq kerek
Beyanatta qayd etilgeni kibi, Ukraina devlet siyasetini vaqtınca işğal etilgen Qırımda amelge keçirmek içün Ukraina Nazirler Kabineti tertibatında, nazirleklerde vaqtınca işğal etilgen territoriyalar boyunca Vekâletli insanlar olmaq kerek.
Batalyonda devlet seviyesinde işğal etilgen territoriyalarda qavmiy ukrain ve qırımtatarlarnıñ qoruvı boyunca Vekâletli insan vazifesini meydanğa ketirmek kerekligini tüşüneler.
Bundan da ğayrı, Qırım ukrainlilerniñ Miiliy Şurasını Qırımtatar Milliy Meclisiniñ tecribesinden faydalanıp teşkil etmek kerek. Bu Şura vaqtınca işğal etilgen topraqlarda yaşağan qavmiy ukrainlilerniñ idare organı olmalı.
Evelsi, Ukraina Yuqarı Şurasınıñ sabıq deputatı Eduard Leonov Mudafaa Nazirligi negizinde «Qırım» batalyonı peyda olğanı aqqında bildirgen edi. Mında bir qaç yüz qırımlı kirmege razı oldı.
